Dempús d’era ressaca d’auer artenhut era maxima distincion de 4 flors d’aunor en Concors de Viles Florides e damb es prumères nhèus enes còtes mès nautes, eth pòble de Bagergue dejà se premanís entara sason d’iuèrn. E ac hè en tot amiar a tèrme òbres d’engodronat. Aguestes an com objectiu milhorar er accés ara localitat e bèri des sòns carrèrs peatonaus.

Ath delà d’aguestes òbres ena carretèra e enes carrèrs, Bagergue tanben a previst començar uns trabalhs d’acondicionament de bèri des barrancs plaçadi en Camin Reiau que junh Bagergue damb Unha. Aguestes milhores anaràn encaminades a que non se repetisquen es vessants d’aigua des barrancs en tot enaiguar eth camin Reiau, com ja passèc aguesta darrèra primauera.

Arrebrembam tanben qu’era carretèra que junh Bagergue damb Salardú a estat en òbres pendent quauqui mesi, e a passat d’auer 4 mètres d'amplada e cauçada, a auer-ne 7 mètres, en tot incrementar d'aguesta forma era seguretat ena circulacion dera via. Un projècte que hège temps que demorauen es lèu 100 abitants deth pòble.

Aguest perfeccionament des infraestructures constituís un gran auanç en seguretat e comoditat entàs vesins de Bagergue e es visitants que s’i apròpen. Ues milhores entà qu’accedir ara localitat, passejar pes sòns carrèrs e hèr excursions peth sòn camin Reiau sigue un atractiu encara major.