Enquia aguest dimenge, 22 d'abriu, era Val d'Aran serà present ena hèira B-Travel, antic Salon Internacionau de Torisme de Catalonha, que se celèbre en palai 8 deth recinte de Montjuïc de Fira de Barcelona. 

Enguan, participen en aguesta hèira un totau de 200 expositors que vien de mès de 40 païsi de tot eth mon, entà presentar era sua aufèrta toristica.

Era participacion de Torisme Val d'Aran ena B-Travel ei englobada ena sua estrategia de potenciacion deth torisme d'aventura, esportiu, rurau, e familhau, e a coma objectiu presentar e promòir er ampli ventalh d'activitats e atractius qu'aufrís eth nòste territòri.

Era Conselhèra de Torisme e Desvolopament Economic d’Aran, Anna Díaz, soslinhèc qu'aguesta edicion der eveniment internacionau de torisme mès important de Catalonha ei un bon moment entà dar a conéisher es naues iniciatiues de Torisme Val d'Aran, atau coma era importanta aufèrta de torisme culturau e d'auviatge istoric qu'aufrís era Aran as visitants pendent tot er an.

IMATGE: CONSELH GENERAU D'ARAN