Vielha e Mijaran estúdie era implantacion der abitatge cooperatiu en regim d'usatge, coma solucion entar accès ara viuenda

14/10/2019

Era problematica der accès ara viuenda ei un des rèptes mès importants qu'an d'afrontar es administracions publiques aué dia, mès tanben en tot pensar enes futures generacions.

En aguest sens, ena Val d'Aran autant eth Conselh Generau d'Aran coma er Ajuntament de Vielha e Mijaran, trabalhen entà implementar ua melhora en accès as abitatges as familhes que viuen en territòri. Ua des opcions que s'a començat a estudiar ei era coneishuda coma “abitatge cooperatiu en regim d'usatge”. Aguest modèl supause era collaboracion public-privada (administracions publiques-cooperatives), damb eth quau se preten facilitar er accès des familhes a naues viuendes, en tot fomentar era figura des cooperatives.

Aguestes cooperatives, que son sense anim de lucre e coma iniciativa sociau, nèishen damb er objectiu de facilitar qu'era gent pogue accedir a ua viuenda digna, mès sense èster proprietari, senon cooperant (sòci dera cooperativa). Un des punts fòrts ei que permet víuer en un abitatge a prètz de còst damb ua rebaisha d'apuprètz deth 60% respecte es prètzi de mercat, de manèra que se produsís un estauvi considerable de sòs. Aguesta opcion de cooperativa pòt èster atractiua entath sector públic, pr'amor qu'es ajuntaments o d'autes administracions pòden cedir parcèles publiques entà bastir aguest tipe d'abitatges, e d'aguesta manèra, ajudar a fomentar er accès ara viuenda ara ciutadania, sense pèrder era titolaritat deth terren cedit. Per tant, ei ua possible manèra de fomentar era promocion der abitatge públic-privat, damb un estauvi economic considerable entàs ciutadans.

Pendent aguest diuendres, tecnics e còssos der Ajuntament de Vielha e Mijaran, atau coma deth Conselh Generau d'Aran, en tot formar part der Ateneu Cooperatiu der Alt Pirinèu e Aran (ACAPA) s'an amassat damb expèrts de La Dinamo Fundació i Lacol entà aprigondir enes coneishements sus er abitatge cooperatiu en regim d'usatge, e auançar enes possibles linhes de trabalh futures, en tot compdar damb era participacion des administracions publiques.

Eth passat 27 de seteme, eth Conselh Generau d'Aran ja acuelhec ua prumèra amassada a on preneren part es còssos der Ajuntament de Vielha e Mijaran, en tot sollicitar aguesta naua amassada damb era preséncia des tecnics entà aprigondir en aguest ahèr e veir s'ei possible implantar aguest modèl d'abitatge ena Val d'Aran.

“Er accès ara viuenda ei un ahèr fòrça delicat aué dia, e cau pensar tanben enes pròplèu generacions. Coneishem a hons aguesta problematica en territòri, e per açò des der Ajuntament mos conscienciam en trabalhar damb es maximes opcions possibles entà poder facilitar-ne er accès”, comente eth baile de Vielha e Mijaran, Juan Antonio Serrano. E hig que “era collaboracion públic-privada ei ua opcion interessanta, e cau estudiar-la ben, entà que pogue èster ua alternativa reau en un futur as modèls convencionaus existents”.

HÒNT: AJUNTAMENT DE VIELHA E MIJARAN

 

 

 

 

 

 

 

 

 

 

 

 

 

 

 

 

 

Laura Rodríguez