Trabalhs de milhora en fronton e ena pista de skate de Vielha

31/05/2019

Pendent aguesta setmana, er Ajuntament de Vielha e Mijaran realize un conjunt de trabalhs entà milhorar er estat des pistes de fronton e de skate plaçades en Eth Solan de Vielha.

Per un costat, s'amien a tèrme trabalhs de pentura e apariament des horats existents ena paret principau deth fronton, pr'amor que damb eth sòn emplec e era climatologia advèrsa der iuèrn, aguesta superfícia auie de besonh ua milhora entà qu'es usatgèrs la poguen emplegar enes condicions avientes damb era arribada der ostiu.

Atau madeish, ei previst cambiar eth sistèma d'enlumenat d'aguesta pista de fronton e ena de skate, en tot installar dus potents foguièrs damb temporizador, entath sòn emplec quan sigue de net.

“Damb aguesti trabalhs que s'alongaràn pendent diuèrses setmanes, volem milhorar er estat d'aguesti equipaments esportius que son fòrça importants entà Vielha e Mijaran e, d'aguesta manèra, qu'es usatgèrs les poguen gaudir damb era màger qualitat possibla, en tot deishar eth conjunt esportiu damb es condicions avientes entara sua practica esportiua damb era arribada der ostiu”, comente eth còsso d'Espòrts, Alberto López.

Un viatge finalizadi aguesti trabalhs, ei previst qu'enes pròplèus setmanes tanben s'amie a tèrme era ampliacion des tanques que i a ena pista de fronton, damb tanques mès estretes entà esvitar qu'es pilòtes se queden atrapades, e d'aguesta manèra tornen a quèir en solèr. E, es darrèri trabalhs, supausaràn era collocacion de diuèrsi bancs e paperères n'aguesta zòna entà refortilhar era qualitat e era berèsa n'aguest espaci, en tot suenhar er entorn naturau.

Hònt: Ajuntament de Vielha e Mijaran

Clara Villar