Tot premanit entara 41au edicion dera Marxa Beret

30/01/2020

Era Val d’Aran se premanís entà acuélher aguesta pròpleu dimenjada ua naua edicion dera Marxa Beret, era pròva d'esquí nordic mès importanta der Estat espanhòu.

Eth dissabte, 1 de hereuèr, tàs 10:00 ores, se celebrarà era pròva de Sprint Salomon, qu'ei Campionat d'Espanha ena modalitat de tecnica liura.

Eth dimenge 2 de hereuèr tàs 10 deth maitin se disputarà era Marxa Beret, que dejà complís 41 ans.
Eth circuit de 10 quilomètres trauessarà Beret e Òrri, mès enguan es corses mès granes, es de 21 e 42 quilomètres non arribaràn a Montgarri per manca de nhèu en aquera zòna.

Aué tàs dotze dera net se barraràn es inscripcions online, mès eth dissabte i aurà ua auta oportunitat d’inscriuer-se de forma presenciau en poliesportiu de Vielha.

Arrebrembam qu’era Marxa Beret ei includida en calendari FIS de carrères populares, Campionat d'Espanha de longa distància e Copa Espanha d'Esquí de hons.
Laura Rodríguez