Era sindica d’Aran a hèt a arribar ath secretari d’Estat d’Abitatge e Agenda Urbana, David Lucas, es resultats des compilacions des terrens e espacis de titularitat municipau facilitadi ath Conselh per part de diuèrsi ajuntaments aranesi, ua mesura qu’a de servir entà qué, per part deth Ministèri, e damb era rèsta d’administracions competentes, s’avalòre era posibilitat d’impulsar abitatge public en territòri.

En mai s’amassèren eth Conselh e er Estat entà explicar-li  era complèxa situacion que patís era Val d’Aran per çò que hè ar accès ar abitatge. Pendent era amassada convenguéren establir conjuntament possibles vies de collaboracion entre andúes institucions tà implementar mesures concrètes tà ajudar a palliar aguesta situacion.

Sonque eth 38% der abitatge existent en Aran se dedique a abitatge abituau, e dèishe ath descubèrt un gran nombre d’abitatges destinadi a residéncies segondàries e a usatge toristic, que provòquen un aument deth prètz deth loguèr, que s’a doblat en un an.

Cau rebrembar que des dera Val d’Aran se pòrte fòrça ans en tot demanar era competéncia en materia d’abitatge pr’amor que limite fòrça era accion a desvolopar se depèn dera Generalitat.