Lèu 900 persones participen ena darrèra Marxa Beret

02/02/2020

Lèu 900 persones an participat ena darrèra Marxa Beret, que serà arrebrembada per un solei que non a deishat de lúder e ues temperatures doces as qu’era Marxa non mos a bric acostumadi.

Tanpòc ei abituau qu'era Marxa Beret non hèsque era tradicionau baishada a Montgarri, quauquarren que a passat enguan degut ara manca de nhèu ena zòna.

Era aranesa Marta Cester pugèc en esglaon mès naut dera categoria femenina en tot acabar era corsa des 42 quilomètres damb un temps de 2 ores e 39 menutes. Era francesa Perrine Abadie artenhec er argent e Henar Etxeberría eth bronze.

Pera sua part, Imanol Rojo se proclamèc guanhador en categoria masculina damb un temps de 2 ores e ua menuta. L’acompanhèren en podium Sadurní Betriu e eth noruec Sigmund Rimstad.

Era Marxa Beret, ei era corsa d’esquí de hons que compde damb mès participacion de tot er Estat espanhòu. Un orgulh entath país aranés.

Ath delà, aguesta Marxa Beret ei puntuable entara Copa d'Espanha d'esquí de hons e forme part deth calendari FIS de Longa Distància.
Laura Rodríguez