Torisme
Eth Conselh Generau d’Aran presente en Madrid era tempsada toristica d’ostiu
11/06/2024
Eth vicesindic tresau e conselhèr d’Espòrts dera maxima institucion aranesa a presentat en Madrid, ena sedença de Baqueira Beret en aguesta ciutat, amassa damb responsables tecnics de Torisme Val d’Aran, es accions previstes per part deth govèrn d’Aran entara tempsada toristica d’ostiu
Eth govèrn d’Aran, a trauès der airau de torisme deth Conselh Generau d’Aran (Foment Torisme Val d’Aran) a presentat aué es activitats programades entad aguest ostiu, entre es quaus cau remercar eth senderisme, damb mès de cinc centes rotes entà toti es nivèus, quate entrades tath Parc Nacionau d’Aigüestortes e Entanh de Sant Maurici o es GR 11 per Catalonha e GR 10 a trauès de França. Tanben, tucs de nauta montanha, en quauqui casi de mès de tres mil mètres de desnivèu, ath delà de granes rotes itinerantes coma eth Camin Reiau.
Es visitaires poiràn practicar espòrts d’aventura, vies ferrata, rafting o escalada sense deishar de costat era gastronomia.
Passejades pes pòbles damb hèstes populares coma eth Haro d’Arties e eth Haro en Les, patrimòni Immateriau dera Umanitat declarades pera UNESCO, tanben pes viles florides, Arties, Bagergue e Garòs, reconeishudes a nivèu nacionau, e ath long der estiu, dances e musica tradicionaus araneses.
Ena presentacion s’a hèt referéncia tanben as passejades en bicicleta damb senhaus de seguiment entà totes es categories, a trauès dera sua aplicacion Guidaran, en tot incidir en besonh de respectar eth miei ambient e era conviuença entre toti es sòns usatgèrs. Ues accions emmercades en desvolopament deth Plan de Sostenibilitat Toristica qu’eth govèrn d’Aran amie a tèrme gràcies a un ajut der Estat.
Es responsables de Foment Torisme Val d’Aran an hèt especiau mencion ath patrimòni aranés, un des hilats mès remercables deth país, damb es sòns musèus e era rota romanica.
Entath vicesindic tresau d’Aran e conselhèr d’Espòrts, Javier Cavero “era Val d’Aran a fòrça tà aufrir aguesta tempsada d’ostiu, a on destaquen, ath delà dera riquesa deth nòste patrimòni, gastronomia e tradicions, eveniments esportius de prumèr nivèu coma pòt èster era UTMB, que mos place coma referent mondiau.” E higie que “eth govèrn d’Aran manten ua estreta collaboracion autant damb Baqueira Beret coma damb es organizadors de corses esportives, entre d’auti actors, entà impulsar eth nòste territòri toristicament e hè’c d’ua forma sostenibla e responsabla”.
Ara presentacion an assistit ua vintea de jornalistes de mieis de comunicacion deth domèni nacionau, qu’an remassat de prumèra man es activitats ludiques, culturaus e esportiues qu’aufrirà era Val d’Aran aguest ostiu.
Cau rebrembar qu’eth Conselh Generau d’Aran collabòre damb Baqueria Beret en matèria de promocion toristica damb diuèrses accions, entre eres er impuls des sues oficines en Madrid e Tolosa (França).
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga