Dempús de mès de tres mesi sense hè’c, eth francés s’a tornat a escotar pes carrèrs dera Val d’Aran, e mès concretaments en Baish Aran, un parçan qu’a ua fòrta dependéncia deth client deth país vesin.

Era redubertura des termières damb França, que s’a produsit pendent aguesta passada dimenjada,  ère eth moment qu’era majoria de comèrci deth Baish Aran demorauen entà recuperar era sua activitat.  

Com ei dejà abituau enes parçans de termièra, es gasolineres, es estancs e es punts de venta d’alcoòl sigueren es mès concorrudi en Baish Aran, en tot formar-se coes en moments determinadi.

Es autoritats deth Govèrn aranés e des disparièrs ajuntaments, totun, apelen ara responsabilitat personau, en tot rebrembar er emplec obligatòri dera mascareta tostemp que non siga possible mantier era distanciacion interpersonau d’aumens un mètre e miei. 

Per un aute costat, eth parc de fauna sauvatja de Bossòst, Aran Park, a profitat tanben aguesta redubertura des termières entà redaurir es sues installacions as visitants.