Era Bibliotèca Generau de Vielha a hestejat eth sòn 20au aniversari

A darreries d’aguest mes de noveme s’an amiat a tèrme disparières activitats culturaus en aguest equipament: iòguicondes, espectacle de manuquètes o eth liurament des prèmis de fotografia e de microrelats.

Entà presentar-se en aguest darrèr calie que cada usatgèr dera plataforma Twitter seguisse eth compde dera Bibliotèca, e que ’piulesse’ un relat de 280 caràcters. Enguan, era tematica escuelhuda entath concors siguec “Er univers ena sua magnitud”, en tot èster un microrelat de creacion pròpria e que non age estat premiat en d’auti concorsi. Damb aguest tipe d’activitats s’a sajat de prebotjar era cultura d’Aran e er aranés entà mantièr-lo viu. 

Ath delà d’èster epicentre de tota ua sòrta d’elements culturaus, era Bibliotèca Generau de Vielha a esdevengut ua referéncia a toti es nivèus entà fòrça generacions.

Er objectiu der Ajuntament de Vielha e Mijaran ei eth d’ampliar mès sales aguest espaci entà que pogue seguir coma un lòc de trobada entà toti es vesins que volen aprohondir enes sòns coneishements o hèr amassades deth mon culturau.