Aguesta Setmana Santa a estat plan especiau: hège ans que no queiguie tan tard. Ne mès ne mens qu’a finaus d’abriu. Un hèt que hège a sautar es alarmes ena Val d’Aran, pera pòur a qu’eth torista de nhèu non s’animèsse a vier enguan.

Totun, des deth grèmi d’Ostalaria dera Val d’Aran, es expectatives non sonque s’an complit, senon que s’an superat. De hèt, en dusau tram dera Setmana Santa s’arribèc de mieja ath 70% d’aucupacion en tota era Val d’Aran. Chifra que en cap-lòc aranés, Vielha, encara siguec mès nauta.

Aguesta setmana santa primauerau a permetut atrèir non sonque ath torista de nhèu, senon tanben a aqueth que mos visite entà hèr d’autes activitats, restacades, per exemple, damb era natura, era cultura o era gastronomia.

En çò que tanh ara avaloracion generau der iuèrn, cau soslinhar es boni resultats artenhudi ena ostalaria a compdar de finaus de gèr, quan es copioses nheuades permeteren que Baqueira/Beret poguesse daurir eth 100% des sues pistes.

Eth client der Estat espanhòu contunhe en tot èster eth que mès visite eth nòste país. Mès cau soslinhar qu’eth client estrangèr va agarrant cada viatge mès fòrça.

A compdar d’ara, eth sector dera ostalaria ena Val dejà se trape en tot premanir-se entara sason d’ostiu damb fòrça optimisme.