A compdar d'aué, eth Palai de Gèu de Vielha torne a acuélher es corsi de patinatge artistic sus gèu, natacion e karate, que s'aueren d'arturar eth passat mes de març com a conseqüéncia dera aparicion dera pandémia dera COVID-19.

Eth 12 de març er Ajuntament de Vielha e Mijaran decidic arturar e barrar totes es installacions municipaus esportives entà previer eth risc de contagi. Pòc a pòc se poderen tornar a daurir, un aute viatge en ostiu, e sonque mancaue per repréner es corsi d'aguestes disciplines esportives. Per tant, a compdar d'ara, era installacion recupère era normalitat, damb era totalitat d'espòrts qu'abantes dera pandémia se podien practicar, e que complèten era aufèrta des activitats dirigides.

Eth consistòri a hèt un esfòrç fòrça important entà poder garantir qu'aguesti corsi se poguen tornar a desvolopar sense risc de contagi. Damb era arribada dera tardor, es usatgèrs pòden tornar a gaudir d'aguesti espòrts, mès en tot auer de seguir eth protocòu vigent aprovat per Ajuntament de Vielha e Mijaran, d'accès e emplec dera installacion abantes, pendent e dempús d'acabar era practica esportiva.

Es corsi de patinatge sus gèu se conformen de tres nivèus (iniciacion, auançat e perfeccionament), damb classes de deluns a diuendres en tot començar entàs 13:40, e finalizar entàs 19:20. Es corsi de natacion s’aufriràn de deluns a diuendres, damb un totau de tres nivèus (iniciacion, auançat e perfeccionament), en orari de 17:30 a 18:20, e de 18:30 a 19:20. En çò que tanh as corsi de karate, s’aufriràn de deluns a dijaus, tanben damb tres nivèus: Iniciacion, dimars e dijaus de 17:20 a 18:10 e de 18:30 a 19:20. Auançat, deluns e dimèrcles de 17:20 a 18:10. E perfeccionament, dimars e dijaus de 20:00 a 21:20.

“Auem hèt un esfòrç important entà adaptar toti es servicis e es espacis deth Palai de Gèu entath sòn emplec abituau, e ara ja podem garantir qu'es corsi que s'an realizat pendent es auti ans, enguan tanben poguen començar ena tardor”, comente eth còsso d'espòrts de Vielha e Mijaran, Alberto López. E hig que “autant es usatgèrs coma es monitors auràn de seguir es directritzes deth protocòu d'accès e emplec dera installacion, aprovat peth consistòri, entà poder garantir eth risc de contagi zèro”.

HÒNT: AJUNTAMENT DE VIELHA E MIJARAN