Es grups d’UA e eth PSC an presentat ua mocion en Plen dera Deputacion entà demanar ara Generalitat que incremente es dotacions de professorat en Aran e es recorsi docents, revertint es retalhades que se realizen des de 2011.

Eth Departament d’Ensenhament anoncièc qu’aguest cors incrementarie era plantilha de mèstres a nivèu autonomic. Totun, era Val d’Aran a començat eth cors escolar damb mens mèstres qu’eth passat.

Eth portavotz deth grop d’UA, Francés Boya, manifèste qu'“aguestes retalhades e era disminucion de professorat en Aran responen a un mensprètz ara nòsta singularitat” e hig que “non podem enténer que se contunhen aplicant aguestes reduccions enes plantilhes quan s’a hèt un aument generau de places e quan era ratio d’alumnes per classa non a pas disminuit senon que s’a mantengut”.

Cau arrebrembar qu'en aguest sens, eth Departament d’Ensenhament auie aplicat ua discriminacion positiua en Aran enquiara data, auent en compde era gestion de tres lengües oficiaus e era aplicacion dera siesau ora lectiua.

De 2011 enquiara, afirme UA, "era Val d’Aran a perdut 11’6 places de mèstres entre educacion primària e segondària".  

Boya remèrque que “segontes anoncièc eth Departament, en Catalonha se comencèc eth cors en seteme damb 5.514 mèstres mès, en Aran era Generalitat a retalhat mès deth 20% deth professorat d’ençà de 2011”

Era mocion presentada inste ara Generalitat a revertir es retalhades en encastre der ensenhament atau coma a incrementar es dotacions de professorat en aqueri territòris a on s’an retalhat e a aumentar es recorsi tà garantir ua escòla de qualitat. Eth tèxte a estat aprovat per unanimitat de toti es grups.