Societat
Regulacion des accèssi e mobilitat tàs airaus naturaus dera Val d’Aran
19/07/2024
Se met en marcha eth nau calendari d’accessibilitat tàs airaus de montanha, qu’a de servir entà regular eth pas de veïculs e entà evitar era acumulacion de visitaires enes endrets naturaus, laguens deth Plan de Sostenibilitat
Eth Conselh Generau d’Aran, a trauès de Torisme Val d’Aran, a metut en marcha eth calendari de regulacion des accèssi e mobilitat entàs airaus naturaus d’Aran.
S’a metut en marcha eth nau dispositiu de contròl tàs ribères de Varradòs e era Artiga de Lin, que s’alongarà enquiath dia 1 de seteme en orari de dètz deth maitin enquias cinc dera tarde (10h-17h). Entàs ribères d’Aiguamòg e de Valarties er orari d’accès ei des sèt e mieja deth maitin enquias tres e mieja dera tarde (7h30-15h30) e seràn regulades enquiath 8 de seteme. Es pistes d’accès tara Bassa d’Oles e tara Bassa d’Arres se dauriràn ath public de manèra regulada a compdar deth dia 29 enquiath dia 1 de seteme en orari des dètz e mieja deth maitin enquias quate e mieja dera tarde (10h30-16h30).
Entà incrementar eth servici d’atencion ath public, eth Conselh Generau d’Aran a contractat de manèra dirècta, per prumèr viatge, a onze persones entàs disparièrs punts d’informacion.
En encastre deth plan de sostenibilitat toristica deth CGA enguan s’an plaçat sies pantalhes informatives en disparièrs parcatges deth miei naturau, tanben uns sensors de pas que servissen entà compdar es veïculs. As dues plaçades en ostiu deth 2023 se n’i higen dues mès, ua ena Artiga de Lin e ua auta ena Bassa d’Oles. Aguest plan de sostenibilitat servís entà planificar eth contròl enes pistes entà accedir tàs endrets naturaus e preservar eth sòn entorn. Es usatgèrs pòden consultar era accessibiltat a trauès dera app de Guidaran o en www.aparcaran.conselharan.org
Eth conselhèr de Territòri, Paisatge e Cambi climatic d’Aran, Francisco Bruna, a manifestat qu’ “er objectiu dera regulacion des accèssi tàs airaus de montanha ei melhorar era seguretat e diversificar era aufèrta toristica en tot desmasificar es endrets naturaus. Aguesta ei ua accion impulsada laguens des linhes estrategiques deth Plan de Sostenibilitat Toristica dera Val d’Aran”.
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga