Naut Aran promò es energies renauïbles en municipi. Eth consistòri a iniciat ua sòrta d’accions damb era qu’a previst incentivar a toti aqueri propietaris que volguen plaçar plaques solares enes sòns immòbles.

En aguest sens, ua des accions mès concrètes ei que totes aqueres persones que siguen vesins de Naut Aran e qu’agen ua viuenda, ja sigue ua viuenda quinsevolha, ua casa, hotèl o ua finca en Naut Aran e volguen méter plaques solares tà destinar-les a energia electrica o aigua cauda auràn ua bonificacion deth 50 % der IBI pendent es 5 ans d’auer hèt era installacion. Aguesta mesura siguec aprovada en darrèr plen consistoriau per unanimitat e es vesins deth municipi poiràn gaudir d’aguestes condicions a compdar der an que ven.

Entara justificacion d’aguesta rebaisha der IBI, auràn de mostrar era factura a on com a minim, un 20% deth prètz dera energia electrica o cauhament d’aigua sigue derivat per aguestes plaques.

En Naut Aran dejà s’an aplicat d’autes mesures tà potenciar era sostenibilitat coma per exemple auer carregadors de coche electrics en toti es pòbles deth municipi.