Centenats de persones an presenciat era cavaucada des reis d'Orient que s'a celebrat en Vielha. Er heired non a arturat era grana illusion des mès petiti entà saludar as 3 reis.

Era cavaucada, qu'a gessut de Gausac, a trauessat eth centre deth cap-lòc aranés enquia arribar en Ajuntament de Vielha. Un còp aquiu, es Majestats an pujat ath consistòri e Melchor a liejut eth sòn tradicionau discors.

Dempús, an baishat e an començat a repartir es prumèrs regals dera net a toti es mainatges e mainades que s'i an apropat.

E ara, non cau non desbrembar-se des preparatius en casa, entà arrecéber es reis coma se meriten.

Aguesta ei, sense cap sòrta de dobte, era net mès magica de tot er an, a on  segur que se compliràn toti es desirs qu'es mainatges an escrit enes sues cartes.

Era Cavaucada tanben s'a celebrat enes pòbles de Bossòst, Les, Arties e Salardú, a on es 3 reis e es patges an repartit illusion e felicitat.