Es alumnes der Institut d’Aran dejà an celebrat era graduacion de toti aqueri que finalizen ua etapa aguest cors 2017/2018.

Alumnes de 4au d’ESO, grad miei e superior des cicles d’Animacion d’Activitats Fisiques e Esportiues e de Gestion Administratiua, 2au de Bachillerat e Bachibac an remassat dejà eth sòn diplòma en ua hèsta plan emotiua que compdèc damb era preséncia de familiars, docents e amics.

Ena nauau Hèsta de Graduacion der Institut, ath delà deth reconeishement as alumnes que, pendent aguesti ans s’an esforçat e an artenhut obtier es sòns objectius academics, se volec hèr un especiau aumenatge as tutors, tutores e era rèsta der equip docent deth centre. Es estudiants voleren arregrair de tot còr era paciéncia e dedicacion qu’an destinat ara sua formacion, academica e personau.

Ara, fòrça d’eri an per deuant ues setmanes dures damb es Pròves d’Accés ara Universitat, qu’auran lòc pendent eth mes de junh.

Un darrèr esfòrç abantes de gaudir des tan demorades vacances d’ostiu e, en fòrça casi tanben, abantes de començar era etapa universitària e deishar darrèr aguest Institut que les a vist créisher pendent toti aguesti ans e que tostemp serà part des sòns arrebrembes.