Eth Conselh destine 4.356 € entara aplicacion der Observatòri Socioeconomic d’Aran, desvolopada pera enterpresa Cylstat SL.

Aguesta ei ua aplicacion disponibla ena web corporativa deth Conselh Generau concebuda entara consulta e analisi d'indicadors de donades socioeconomiques coma donades demografiques, deth mercat de trabalh, d'activitat economica e pressupòsti municipaus.

Aguesta solucion intègre desparières donades estadistiques actualizades entà conéisher es chifres basiques deth conjunt dera Val d'Aran e es municipis damb difusion visuau e interactiva. Totes es donades provien de hònts oficiaus e s'actualizen de manèra contunhada.

Er article 67.3 dera Lei d'Aran preve que “Eth Conselh Generau d'Aran a de crear er Observatòri Socioeconomic d'Aran, damb es objectius, entre auti, d'estudiar, actualizar, gerir e prepausar mesures e accions as administracions publiques e ath conjunt dera societat aranesa en benefici der interès generau. Era composicion, era estructura, es foncions e era organizacion der Observatòri s'establissen per reglament”.