Era estacion d’esquí de Baqueira Beret a acuelhut era prumèra des dues pròves de Slalòm de Copa d’Euròpa qu’a previst de hèr pendent aguestes dues jornades deth 6 e 7 de hereuèr.

Es condicions de nhèu entara competicion an estat excepcionaus pr’amor qu’an trabalhat era pista pendent lèu un mes a base d’aigua entà hèr ua capa de gèu d’ath torn de 20 centimètres e es nheuades des darrèri dies tanben an permetut poder auer un shinhau de nhèu naua qu’ajudaue a assolidar era que dejà i auie.

En çò qu’a a veir damb era pròva, eth catalan corredor dera Molina, Quim Salarich, a amiat a tèrme ua espectacular remontada, des deth dorsau 39 enquiara 8au posicion. Ena dusau manja, a efectuat eth dusau registre mès rapid, un hèt que demòstre que damb pista neta, pòt optar a tot.

Era rèsta de corredors dera Federacion Espanhòla coma Juan del Campo, a acabat eth 22au, Aingeru Garay eth 29au e Tomás Barata, Aleix Aubert e Jonás Sánchez non an pogut finalizar era corsa.

Era pròva a estat guanhada  per austriac Simon Rueland seguit der italian Matteo Canins e eth podium l’a barrat eth norueg Oskar Andreas Sandvik.

Deman, naua pròva de Copa d’Euròpa a compdar des 9:30 deth maitin.