A compdar dera setmana que ven s’inícien es classes des naui corsi d’aranés aufrits peth Conselh Generau d’ARan, que seràn tant online coma presenciaus.

De cada viatge crèish mès er interès per part des vesins e persones de dehòra dera Val d’Aran per apréner e mestrejar era lengua ath maximom nivèu pr’amor que pòt èster tanben ua forma entà arténher gessudes laboraus en places publiques ena administracion, entre d’auti lòcs.

En aguest sens, es nivèus que s’aufriràn serà, coma tostemp, er A1, A2, B1, B2 e C1 e es oraris anaràn en funcion deth nivèu ath que s’apertie. Per prumèr viatge, s’a auut de hèr un sorteig en quaqui des nivèus pr’amor qu’era demanda ère fòrça nauta e i a un maximom estipulat per classe.

Eth prètz dera matricula generau ère de 52 èuros e es examèns se hharàn en prumèra convocatòria, en Vielha e Barcelona, enes mesi de mai e junh de 2025 e era dusau convocatòria en Vielha en seteme de 2025. Eth govèrn d’Aran rebrembe qu’aguesti corsi d’aranés son es unics que son oficiaus e que servissen se se vò accedir a bèra ua des places publiques que s’auferten.