Convèni entath finançament des ordenadors des escolans de 5au e 6au de primària

10/04/2019

Eth Conselh Generau d’Aran e es Escòles Garona de Vielha, Sant Ròc de Bossòst, Ruda de Salardú, Loseron d’Arties e Alejandro Casona de Les an signat un convèni de collaboracion entath finançament des ordenadors des escolans de 5au e 6au de cada centre. Tanben s'i tien en compde aqueri mainatges dera ESO que s'incorpòren damb retard ar ensenhament aranés e que non an dotacion especifica d'ordenador.

Eth Govèrn aranés a apostat per un projècte de digitalizacion des aules basat en Projècte 1x1 iniciat peth Departament d'Ensenhament dera Generalitat de Catalunya, qu’en Aran se concretèc de forma pionèra en Catalunya enes corsi de 5au e 6au d’Educacion Primària.

Aguest projècte de digitalizacion, iniciat dejà hè diuèrsi exercicis, a implicat que totes es escòles dera Val d’Aran agen podut installar disparièrs equipaments informatics e recorsi educatius digitaus en tot adaptar es sues installacions as naui requeriments.

Es centres d’educacion primària dera Val d’Aran participen en aguest procès en tot elaborar tota sòrta de materiaus educatius digitaus atau coma participant en procèssi de formacion en naues tecnologies en mon educatiu.

Es caracteristiques tecniques minimes des ordenadors a aquerir les determinarà cada centre escolar en foncion des requisits tecnics de besonh entath desvolopament des classes.

Eth Conselh Generau d’Aran finançarà cinquanta euròs per escolan e document de pagament, enquia un maxim de 3.450,00 €. Aguest Convèni aurà vigéncia pendent eth cors escolar 2018-2019

“Eth Conselh Generau d’Aran avalore fòrça positivament aguest projècte, e pr’amor d’aquerò a era volentat d’implicar-se-i economicament, en tot ajudar as familhes a afrontar era despena dera crompa d’un ordenador ja qu’ei conscient der esfòrç que les supòse híger aguesta despena ara crompa de libres de tèxte” a soslinhat eth Sindic d’Aran, Carlos Barrera.

Hònt: CONSELH GENERAU D'ARAN

Clara Villar