Baqueira/Beret, qu’auec de barrar es sues installacions eth passat 14 de març, un mes abantes de çò qu’auie previst, a hèt un balanç plan positiu des mesi en actiu. 

Arrebrembam qu’es fòrtes nheuades dera tardor permeteren ara estacion inaugurar era sason de forma anticipada eth 23 de noveme. En mes de deseme, Baqueira/Beret dejà compdaue damb mès de 150 quilomètres de traçats e era majoritat de remontadors e pistes en foncionament. 

Ua sason que serà rebrembada per un gran pònt dera Puríssima, uns Nadaus damb bona afluéncia de gent e un hereuèr damb un solei imperant.

Suberges eth gran esfòrç amiat a tèrme ena estacion en çò que tanh ara produccion de nhèu. Aguesta sason sonque a compdat damb 26 dies de nheuades, mès er excellent servici de produccion de nhèu  a garantizat eth 100% deth domeni esquiable. 

Dempús de víuer aguesta atipica sason, ara cau demorar ara evolucion dera pandèmia deth coronavirus e as indicacions des autoritats sanitàries a governamentaus. 

Des de Baqueira, dejà an afirmat que s’adaptaràn as mesures que calgue entà començar damb illusion era pròplèu sason de nhèu.