Societat
Baqueira-Beret acuelherà era Copa d'Euròpa d'esquí aupin en 2025
20/06/2024
Ua equipa tecnica dera Federacion Internacionau d'Esquí e Snowboard (FIS) visitèc eth dijaus 13 de junh era pista e installacions a on se disputaràn es dus slaloms masculins de Copa d'Euròpa previsti entàs dies 6 e 7 de hereuèr de 2025
Damb acumulacions de nhèu encara plan visibles enes cims des pics mès nauti dera Val d'Aran e Valls d'Àneu, diuèrsi responsables dera FIS realizèren a miejans de junh era visita tecnica preceptiva ath Stadium Fernández Ochoa de Beret entà arreconéisher era pista homologada e era resta des installacions que s'aufriràn as esquiaires de Copa d'Euròpa en hereuèr de 2025. Era pròva ei ja laguens deth calendari FIS mès eth vist-e-platz oficiau e definitiu per part d'aguesta entitat se balharà en seteme.
Eth coordinador dera Copa d'Euròpa masculina, Wim Rossel, e eth coordinador des Copes Continentaus e dera d'Euròpa femenina, er olimpic Jordi Pujol, visitèren Beret dera man dera equipa tecnica de Baqueira acompanhadi d'Alex Barés, director generau, e deth tanben olimpic e director comerciau, Xavi Ubeira. Tanben hèren part deth cortègi eth president dera Reau Federacion Espanhòla d'Espòrts d'Iuèrn (RFEDI SpainSnow) May Peus Espanha e diuèrsi tecnicians dera federacion.
Dempús dera inspeccion, Xavi Ubeira declarèc que «des de Baqueira èm erosi dera visita qu'auem agut damb es tecnicians dera FIS donques qu'a estat un trabalh fòrça productiu e auem tractat tèmes claus entara familha FIS coma son eth lotjament, es skiroom de preparacion de materiau, era ubicacion deth burèu de corsa e er airau entàs eveniments».
Eth director comerciau de Baqueira tanben a confirmat que bona part dera visita s'a centrat ena pista en tot declarar que «auem vist a Wim Rossel satisfèt damb er estadi e, sense dobte, era collaboracion damb era RFEDI amassa damb era FIS mos permeterà aué'c tot a punt entad aguest gran eveniment d'esquí aupin».
HÒNT: BAQUEIRA-BERET
HÒNT: BAQUEIRA-BERET
Manu Moga