A finalizar eth periòde de licitacion deth projècte de reurbanizacion dera Plaça Còto Março de Vielha impulsat peth consistòri municipau. Un espaci compausat de 1405 m², a on se realizarà era adaptacion dera plaça limitant er espaci reservat entath parcatge de veïculs e ua auta part mès ampla entà que poguen transitar es pedons, en tot fomentar ua milhora dera urbanizacion d’aguest parçan deth Casc Antic.

Damb un pressupòst totau de 365.110€, era prevision ei qu’es actuacions poguen iniciar-se aguest madeish ostieu. .Per tant, damb aguest projècte, se balharà protagonisme as pedons, en ua intervencion que se compren coma ua prepausa globau que vò omogeneïzar era plaça e eth sòn entorn entà méter en valor es elements caracteristics existenti coma son era Glèisa Sant Miquèu, es façades e era vegetacion e connectar-se damb eth centre istoric.

Ena plaça i aurà un paviment caracteristic que ligarà es desparières zònes e accèssi, en tot favorir es circulacions intèrnes en quinsevolha direccion e sentits possibles entre es carrèrs que i arriben. Atau madeish, i aurà un seguit de mobiliari urban qu’ajudarà a acotar er espaci reservat ath transit. Çò que tanben ei previst ei qu’aguesta plaça Coto Marzo sigue ornamentada damb flors e arbes entà que pogue esdevier un espaci verd.