Societat
Artenhem eth compromís dera Deputacion de Lleida tara melhora de vies e infraestructures ena Val d’Aran
29/02/2024
Damb aguest compromís se poderàn afrontar òbres de melhora e acondicionament d’infraestructures coma eth pònt d’Es Bòrdes e eth pònt pedanhèr de Vielha, o carretères coma era de Vilamòs, era de Mont e Montcorbau o era via entre Aubèrt e Vila
Eth vicepresident tresau dera Deputacion de Lleida, e alcalde de Vielha e Mijaran, Juan Antonio Serrano, acompanhèc aguesti dies endarrèr as servicis tecnics dera Deputacion de Lleida ena visita a diuèrses infraestructures e carretères araneses entà avalorar es projèctes e actuacions que se i an d’amiar a tèrme. Entre d’autes, se visitèc eth pònt d’accès ath pòble d’Es Bòrdes, qu’a de besonh ua importanta inversion entà adaptar-lo ara normativa vigenta e deth qué ja dispause d’un projècte entà incrementar era seguretat des usatgèrs. Ena trobada tanben i sigueren presents eth Conselhèr de Lairissa, Oriol Sala e era bailesa deth municipi, Rosa Mirat, que volec remercar “era importància qu’a aguest projècte entà garantir era seguretat e benèster des sòns usatgèrs”.
Atau madeish, tanben se visitèc era carretèra que balhe accès a Vila d’Aubèrt ençà, entà estudiar es trabalhs que s’i an d’amiar a tèrme tà melhorar-ne er estat.
En aguest sens, eth grup d’Unitat d’Aran ena Deputacion de Lleida tanben trabalhe entà arténher era implicacion dera Deputacion ena carretèra d’accès de Canejan, ena qué tanben i collabòre eth Conselh Generau d’Aran e eth pròpri Ajuntament, era carretèra de Vilamòs (LV-5055) e era carretèra de Mont e Montcorbau, entà garantir un accès segur as usatgèrs e veïculs.
Atau madeish, Serrano mostraue era sua satisfaccion pera “bona predisposicion dera Deputacion de Lleida e des sòns servicis tecnics entà ajudar a resòler, ena mesura de çò possible, es disparièrs problèmes que patissen aguestes infraestructures e vies de comunicacion”, e higie, “contunharam trabalhant entà qu’es diuersi projèctes se desvolopen e poguen èster ua realitat”.
HÒNT: UNITAT D'ARAN
HÒNT: UNITAT D'ARAN
Manu Moga