Er Ajuntament de Naut Aran a amiat endauant es bases entà poder optar ara viuenda assequible qu’eth consistòri a prebotjat ena poblacion de Garòs.

Cau rebrembar qu’er Ajuntament destine mès de 65.000 èuros ara reforma integrau dera antiga viuenda des mèstres que compde damb ua superfície de 80m2 e que compdarà damb 2 abitacions, 1 banh, salon, codina e ua petita zòna tà sauvar objèctes.

Es bases indiquen que cau èster major d’edat, residir en municipi de Naut Aran e auer uns ingrèssi ena unitat familhar de minim 25.000 èuros ar an.

Respècte es punts que se pòden guanhar, se darà un maxim de 25 punts a rason de 1 per an empadronat, es parelhes qu’an mainadèra, 2 per cada hilh, 2 punts es familhes monoparentals, 1 punt per discapacitat d’enquiath 33%, 2 punts enquiath 66% de discapacitat, 2 punts es persones que residisquen en Garòs, 2 punts es persones que trabalhen en Garòs e 1 punt era gent que trabalhe en Naut Aran.

Er Ajuntament damb eth sòn baile ath capdauant an afirmat que son un consistòri qu’ei de hèts e non de paraules e qu’accions coma aguestes ac demòstren en temps.