Política
Eth govèrn d’Aran lance ua formacion tà hemnes que vòlen hèr carrèra en ambit esportiu, dera man dera Associacion der Espòrt Espanhòu
19/03/2024
Aguesta formacion començarà eth pròplèu dimèrcles 3 d’abriu, s’amiarà a tèrme de manèra telematica e dejà ei dubèrt eth termini d’inscripcion entà quinsevolh hemna dera Val d’Aran interessada
Eth govèrn deth Conselh Generau d’Aran, amassada damb era ADESP, era Associacion der Espòrt Espanhòu, a organizat un programa de formacion entà hemnes que son interessades en èster dirigents esportives, entrenadores o realizar quinsevolh auta foncion laguens deth sector esportiu.
Eth cors s’iniciarà eth 3 d’abriu, constarà de 20 ores e serà en format telematic. Eth termini d’inscripcion entà quinsevolh hemna interessada ei dejà dubèrt en següent ligam: https://www.sportnet4women.es/rdl-aran
Eth programa ei compausat per quate moduls enfocadi toti eri ath sector der espòrt: aprenedissatge de soft skills o abilitats personaus, gestion de projèctes, casi d’èxit inspiradors e un darrèr modul en que s’expliquen es estructures d’organizacion esportiva en país.
Eth conselhèr d’Espòrts, Javier Cavero, manifestaue que “impulsar era formacion des hemnes ena gestion esportiva e fomentar qu’agarren eth lideratge enes entitats esportives ei un ahèr clau entà afavorir ua igualtat efectiva en aguest airau” e higie que: “deth sòn lideratge se veirà afavorit er increment de hemnes en d’auti estaments deth sector”.
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga