Eth govèrn aranés renauís eth convèni damb era oficina de Val d’Aran e Baqueira Beret en Tolosa

19/06/2020

Eth govèrn deth Conselh Generau d’Aran a renauit entà quate ans mès eth convèni de collaboracion damb era oficina de Val d’Aran e Baqueira Beret en Tolosa, plaçada en numerò 39 dera Rue du Pharaon.

Aguest conveni, afirme eth conselhèr d’Economia, Torisme e Promocion Economica, Juan Antonio Serrano, “mos aufrís ua grana oportunitat entà promocionar eth torisme d’iuèrn ena Val d’Aran e Baqueira Beret de cara ara pròplèu tempsada d’esquí mès tanben compòrte un foment important entà publicitar es atractius deth territòri pendent tot er an”. E hig que: “des deth Conselh Generau d’Aran trabalham entà reactivar eth torisme d’ua forma responsable e prudenta en territòri auent en compde era situacion tan complicada que viuem pr’amor deth COVID-19”.

En aguest sens, era region sud de França, damb Midi-Pyrénées, a un pes fòrça important ena economia d’Aran e, per aguest motiu, era renovacion d’aguest convèni damb era oficina de Tolosa ei ua grana noticia entath territòri.

HÒNT: CONSELH GENERAU D'ARAN

Laura Rodríguez