Eth plen deth Conselh Generau d’Aran a aprovat per unanimitat ua mocion presentada per Unitat d’Aran entà exigir ara Generalitat de Catalonha qu’amie a tèrme eth desplegament dera Lei der occitan, aranés en Aran de 2010, pr’amor qu’an passat lèu 8 ans des dera sua aprovacion, e lèu non s’a realizat cap tipe d’auanç. Actuauments, era subvencion en matèria lingüistica dera Generalitat ei de 60.000€, mentre que des dera Val d’Aran, se demane qu’aguesta quantitat sigue de 300.000€, coma mèrque era Lei d’Aran.

Era mocion contemple era creacion d’ua comission entà elaborar un plan d’accion tà milhorar era salut sociau der aranés. Atau madeish, serie de besonh ua auditoria extèrna en matèria de lengua tà saber era situacion der aranés enes airaus sociaus, coma poderie èster eth comèrç e que l’amiarie a tèrme ua institucion independenta. Atau madeish, eth síndic d’Aran, Carlos Barrera, tanben a confirmat qu’a enviat ua carta ath ministre d’educacion, Méndez de Vigo, entà exigiir-le que demane perdon as aranesi pes sues desafortunades paraules respècte ara aranés, en tot mensprear-lo en ua intervencion hè uns dies.

Ath delà, eth plen tanben a aprovat eth padron dera taxa deth servici de remassades de lordères, en tot establir-lo en 1,5 milions d’èuros, çò que supausen lèu un 3% superior ath der an 2017. E tanben s’a trèt a concors dues places laboraus dera entepresa de Pompièrs e Emergències, en tot milhorar-les tà passar de mieja jornada a jornada complèta.