Aguest dimenge, 26 de mai, amassa damb es eleccions municipaus e es europèes, es vesins e vesies dera Val d’Aran escuelheràn tanben as 13 conselhèrs que conformen eth Plen deth Conselh Generau d’Aran.

Eth nombre de conselhèrs a escuélher varie segontes es terçons: en Pujòlo s’escuelhen dus representants, atau coma en Arties e Garòs, en Castièro eth numerò ascendís a quate, mentre qu’en Marcatosa e Lairissa s’escuelh a un conselhèr o conselhèra e en Quate Lòcs, tres.

Enes passades municipaus, Convergéncia democratica Aranesa (CdA) obtenguec un totau de sèt conselhèrs, Unitat d’Aran (UA) cinc e eth Partit Renovador d’Arties e Garòs (PRAG), un.

Enguan er actuau sindic, Carlos Barrera, se torne a presentar ara reeleccion per CdA.

Paco Boya torne a èster candidat a sindic un còp mès per UA.

I a quate candidats e candidates mès, toti eri naui entà aguest cargue: Rafael Hinojosa, que pren eth rellèu en PRAG; Mireia Boya, enquia hè pòc dirigent dera CUP e qu’ara enteste era lista deth nau partit Aran Amassa; Joan Estévez, que se presente per Ciutadans; e Paula González, de Podem.

Enes eleccions municipaus donques, se decidirà eth futur non sonque des Ajuntaments e Entitats Municipaus Descentralizades (EMD), senon tanben deth govèrn aranés.