Un des ahèrs que se tractèren ena passada amassada dera presidenta dera Deputacion de Lhèida damb eth Govèrn d’Aran siguec eth desplegament deth projècte entà implantar era fibra optica en toti es pòbles dera Val.

Era prevision ei qu’en un maxim de 4 ans toti es pòbles dera província de Lhèida poguen gaudir dera connexion damb fibra optica. Un projècte impolsat e finançat entre era Deputacion de Lhèida e era Generalitat de Catalonha.

Eth servici de fibra optica ei essenciau entà incrementar era competitivitat des empreses dera Val d’Aran.

Era arribada dera fibra optica presentarà un revulsiu entà emprenedors que generarà naues oportunitats economiques.

Non i a cap de dubte: era fibra optica s'a convertit en un element vitau tant entàs naui modèus de negòci coma entàs enterpreses qu’afronten era Transformacion Digitau empenhudes pes naues tecnologies e naues abituds des consumidors.