Er Ajuntament de Vielha e Mijaran bonificarà as veïculs que respècten eth miei ambient.

Atau se decidic en darrèr plen ordinari deth consistòri, qu’aprovèc era modificacion dera ordenança fiscau sus er impòst as veïculs de traccion mecanica. A compdar de 2019, es propietaris de veïculs electrics, ibrids, bimodaus, veïculs impulsadi  damb energia solar o aqueri qu’hèn a servir biocombustible, gaudiràn d’ua reduccion deth 75% dera quòta a pagar.

Damb aguesta modificacion e era futura installacion de punts de recarga electrica en municipi, se vò promòir era sensibilizacion urbana damb era emission de gasi contaminants.

Aguest darrèr plen venguec tanben marcat per èster eth prumèr en quau Unitat d’Aran non anaue damb majoria absoluta dempús de que, qui auie estat tresau tinent de baile, Rufino Martínez, renoncièsse ath sòn cargue en govèrn locau e abandonèsse eth grup municipau, mès non er escon en plen, en tot passar a èster regidor non adscrit ara oposicion.

S’aprovèren tanben en aguest plen era rèsta de taxes municipaus en relacion as installacions e espacis d’usatge public, atau coma eth modèu de contròl intèrn, de fiscalizacion e intervencion dera gestion economica e financèra.