Espòrts
Visita aranesa entath Sud-Tirol, en Itàlia
Damb er objectiu de conéisher naues practiques sostenibles en entorns de montanha
Eth conselhèr d’Infraestructures e Òbres deth Conselh Generau d'Aran, José Luis Boya, amassa damb representants des ajuntaments qu’an podut desplaçar-se enquia Itàlia coma eth de Vielha Mijaran, e eth d’Es Bòrdes an viatjat entath Sud-Tiròl (Itàlia), ena region de Bolzano-Naut Adige, tà participar ena prumèra trobada deth projècte “Hilats de Calor Sostenibles en Pirenèu” impulsat peth Centre de Sciència e Tecnologia Forestau de Catalonha damb eth supòrt deth Ministèri tara Transicion Ecologica tath Rèpte Demografic e que s’emmèrque en projècte de gestion forestau dera Val d’Aran.
Eth conselhèr José Luis Boya a manisfestat: qu’en aguestes jornades auem coneishut de prumèra man ua realitat semblanta ara nòsta pr’amor des similituds territoriaus en aprofitament forestau dauant eth cambi climatic.
Des deth Conselh Generau d’Aran ja hè temps que se trebalhe en ua huelha de rota ath torn dera transformacion energetica entar usatge de biomassa, tant enes organismes estataus coma enes ajuntaments aranesi. Eth cas mès recent ei eth deth cauhatge a trauès d’aguest sistèma, der Espitau Val d’Aran e part dera Residéncia Sant Antòni, que damb dues caudères que foncionen de manèra independenta, corbís eth consum des dues installacions.