Espòrts
Naut Aran apròve era creacion d'un projècte tà bastir 60 lotjaments tà trabalhadors
Damb eth prètzhèt de poder acuélher a toti aqueri trabalhadors que non trapen viuenda enes sason d'iuèrn o ostieu
Eth Plen der Ajuntament de Naut Aran a aprovat provisionaument era creacion de 60 lotjaments de 30 m2 que poderie beneficiar a ues 120 persones damb es vots a favor dera equipa de govèrn de Convergéncia Aranesa e Unitat d’Aran e damb eth vòt en contra deth grop d’Aran Amassa.
A gessut endauant ua modificacion des Normes Subsidiàries (NNSS) entà cambiar er usatge d’ua parcèla de 1800 mètres quarrats plaçada en Baqueira, eth Plan Especiau numerò 1, a equipaments dotacions entà bastir aguesti lotjaments autant coma un complèx entath grop de Pompièrs e Emergéncies e un magazèm entara brigada municipau. Era propietat deth terren serie der Ajuntament de Naut Aran, totun, se prepause des deth consistòri un concors public tà qu’era gestion sigue extèrna entà qu’eth projècte sigue ua realitat.
Aguesta mesura coincidís damb era aprobacion des bases de loguèr assequible que seràn ua realitat en pòc temps pr’amor qu’eth prumèr pis de loguèr assequible de Naut Aran plaçat en Garòs ei lèu acabat e se demore qu’a compdar de seteme pogue entrar ua familha a víuer.