Mès de 700 persones an participat en programa Espòrt Popular

14/06/2019

Eth pròplèu 27 de junh finalize era 2au edicion deth programa Espòrt Popular, impulsat per Ajuntament de Vielha e Mijaran amassa damb eth Conselh Esportiu dera Val d'Aran. Aguest programa que cerque promòir era practica de desparièrs espòrts minoritaris a nivèu popular en Palai d'Espòrts de Vielha, pendent es mesi d'octobre e junh.

Un cicle d’activitats a on es deluns se podie practicar basquet, es dimars tennis taula e badminton, es dimèrcles fotbòl sala e es dijaus se barraue eth cicle setmanau damb tennis taula e vòleibòl.

En aguesti nau mesi, mès de 700 persones an participat en aguest conjunt d'espòrts que, per dusau an consecutiu, s'a aufrit ath long dera setmana entre es 20 e es 22 ores.

Eth còsso d'Espòrts der Ajuntament de Ajuntament de Vielha e Mijaran, Alberto López, mostraue era satisfaccion deth consistòri pera acuelhuda qu'a tornat a auer eth cicle d'Espòrt Popular en  municipi: "un aute viatge, fòrça gent a participat enes diuèrsi espòrts que s'an premanit, en ua accion que çò que preten ei dinamizar es installacions esportiues municipaus, entà qu'autant es joeni coma es adults agen un espaci, coma ei eth Palai d'Espòrts, a on poguen practicar espòrt e, ath madeish viatge, socializar-se”.

Eth prètz de cada session per persona ère de 3 èuros, qu'includís er accès as pistes, er emplec deth materiau esportiu e es bevendes.

Enguan, a diferéncia dera prumèra edicion, es tornegi populars d'aguesti espòrts s'amiaràn a tèrme pendent eth dusau semèstre de 2019. Mès endeuant se balharà mès informacion sus es desparières convocatòries.

Clara Villar