Damb volontat, espòrt e fòrça d’umor. Atau ei coma mès de 300 persones an decidit dar comiat ath 2018 en Bossòst, a on s’a celebrat era 12 au edicion dera corsa de Sant Silvèstre. Chapèus de pair Nadau, pelhes e d’auti ornaments an enaiguat Bossòst pendent eth darrèr dia der an.

Ua edicion ena que s’a batut rècord de participacion e es corredors an pogut gaudir d’un recorregut unic de 6 quilomètres, un mès respècte der an passat.

Es corredors, que gesseren tàs 4 dera tarde deth pònt de Bossòst, correren pera N-230 enquiara rotonda des Pompièrs, dempús seguiren per Pietat en tot passar peth centre de Bossòst. Ara seguida, s’agarrèc eth camin de Camun enquiath pònt de hèr. Era meta siguec eth madeish punt de partida, eth Pònt.

Non a mancat tanpòc era lectura d’un manifèst en contra dera violéncia maschista e es arrebrembes ara professora assassinada eth passat deseme, Laura Luelmo. D’aguesta forma, era corsa a volut soslinhar era importància a que toti poguen córrer de forma liura, sense auer pòur ad arren.

Eth pòdium masculin se l’a emportat Mathieu Penza, e eth prumèr lòc dera categoria des hemnes a estat tà Neus Vidal.

Dempús dera corsa, es participaires an pogut gaudir d’ua bona chicolatada en pòliesportiu municipau.