Eth Govèrn d'Aran, molèst pera manca de rigor de bèri mieis de comunicacion

17/07/2020

Eth Govèrn dera Val d’Aran non a trigat a mostrar-se molèst dauant eth tractament dera informacion que, segontes diden, bèri mieis de comunicacion an hèt sus er episòdi de rebròts qu’a patit era comarca deth Segrià, e qu’an acabat per confinar aquera demarcacion. 

Segontes eth Conselh, diuèrsi mieis an confonut era comarca de Lhèida damb eth conjunt dera província, en tot provocar grèus efèctes en nòste parçan, restacadi damb era anullacion de resèrves en sector dera ostalaria.

Mès deth 80% dera arriquesa dera Val d’Aran s’obten a trauèrs deth torisme, e ei per açò qu’ei essenciau era transparéncia e era informacion reau en çò que tanh ara situacion sanitària ena Val d’Aran. Arrebrembam que hè mès d’un mes se produsic un bròt en ua amassada d’amics a on s’infectèren nau persones. 

Totun, un mes dempús, aquest bròt dejà s’a dat per finalizat e se pòt afirmar que aué dia era Val no compde damb cap de persona infectada.

Ath delà, ei bon de saber qu’era Val d’Aran se trape a lèu 180 km de Lhèida e qu’era Generalitat permet emplegar es autovies de Lhèida tostemp qu’era origina e era destinacion des trajèctes non siguen era comarca deth Segrià. 

Laura Rodríguez