Espòrts
Eth Govèrn d’Aran milhore es camins de Sarrahèra e Colomèrs
06/11/2024
Se tracte de dus camins istorics, plaçats enes parçans de Sarrahèra- Fontfreda e Colomèrs-Montanheta, eth prumèr des quaus permet ua rota circulara ena zòna dera boca nòrd deth tunèl de Vielha
Era prumèra des accions s’a hèt en camin que connècte Sarrahèra damb era cabana deth Pontet, qu’actuauments servie coma passatge tath bestiar. S’a recuperat era plataforma deth camin, s’an bastit passi tara aigua e enes trams iniciau e finau s’an hèt marcatges, perque trauèsse prats a on eth traçat ei de mau identificar. Ena part mejana deth camin s’a apariat e consolidat un tram qu’ère maumerent.
Era dusau intervencion de milhora e senhalizacion s’a hèt entre es Banhs de Tredòs e era Montanheta, qu’ara se hège a servir coma alternativa ara pista, fòrça transitada per servicis de taxi, d’accès tath paratge naturau de Colomèrs e Aigüestòrtes ath long der ostiu. Aguest camin ei utilizat pes visitaires qu’arriben enes Banhs de Tredòs e que se’n servissen entà arribar tà Colomèrs e tath parçan d’Aigüestòrtes. Es trabalhs an consistit ena recuperacion dera plataforma deth camin, era construccion de gradons de pèira seca, era substitucion de baranes e marcatges de continuitat.
S’a intervengut en dus sectors: entre es Banhs de Tredòs e eth saut de Colomèrs e entre eth saut de Colomèrs e era Montanheta.
Eth còst totau des intervencions ei de 35.211,00 euros, finançadi peth Conselh Generau d’Aran a trauès d’ua subvencion deth Departament de Territòri dera Generalitat de Catalunya.
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga