Es oficines de Torisme Val d’Aran compden damb un nau sistèma QR tà consultar es huelhetons toristics

09/07/2020

Foment Torisme Val d’Aran a implementat un nau sistèma digitau entà consultar es huelhetons toristics deth territòri basat ena lectura des còdis QR plaçadi tant en exterior coma en interior des oficines de torisme.

“Des der inici dera legislatura trabalham entà implementar un torisme mès adaptat ath mon digitau e aguesta iniciatiua, ath delà de hèr a servir ua tecnologia tan profitosa coma es còdis QR, mos ajude tanben a implementar ua naua politica mès ecologica, en tot redusir fòrça notablement er usatge de papèr enes nòstes oficines”, afirme eth conselhèr d’Economia, Torisme e Promocion economica, Juan Antonio Serrano, que hig que: “aguest ei un projècte en que dejà portauem temps trabalhant mès, coma en d’auti aspèctes, era crisi provocada peth COVID-19 mos a hèt auançar era sua implementacion entà aufrir as nòsti visitants ua opcion mès segura, en tot esvitar elements que poguen afavorir era propagacion deth virus”.

Rebrembam qu’er orari d’atencion ath public des oficines de torisme ei de 9:00 a 14:00 ores e de 15:00 a 21:00 ores de deluns a dimenge e que, pr’amor dera crisi sanitària, s’an implementat es següentes mesures de seguretat:

-        Aforament limitat a 4 persones
-        Mascareta obligatòria
-        Lauar-se es mans damb gel idroalcoolic en entrar ena oficina
-        Respectar era distància de seguretat

HÒNT: CONSELH GENERAU D'ARAN
Laura Rodríguez