Es eleccions municipaus en Naut Aran

21/05/2019

Montgarri, Vaquèira, Tredòs, Unha, Bagergue, Salardú, Gessa, Arties e Garòs. Nau pòbles, dividits enes terçons de Pujòlo e Arties e Garòs conformen eth municipi de Naut Aran.

Damb 1790 abitants, ei eth dusau municipi mès poblat dera Val d’Aran, sonque dempús de Vielha e Mijaran, e eth mès extens damb lèu 250 km² que comprenen ath torn deth 40% deth territòri.

En aguest municipi ei plaçat un des majors motors economics dera Val d’Aran: era estacion d’esquí Baqueira-Beret, pera quau passen milèrs e milèrs de persones cada an.

Naut Aran compde damb cinc Entitats Municipaus Descentralizades (EMD) e un Ajuntament format per 9 còssos: 6 de CdA e 3 d’UA.

En aguestes eleccions municipaus, es vesins e vesies des pòbles de Naut Aran auràn d’escuélher as sòns alcaldes pedanis e tanben as sòns representants en Ajuntament municipau, institucion a on enguan se presenten tres candidatures.

Per un costat e coma nauetat, eth nau grop politic Amassa presente ua lista entestada pera candidata Neus Canals, a qui acompanhen Marc Vilatovà, Eduard Vilò, Omaira Valiente, Nil Llarden, Griselda Perea, Àdria España, Rosanna Sellart e Albert Mombiedro.

Pera sua part, Unitat d’Aran torne a apostar per Paco Bruna, seguit ena sua lista per José Paba, Marc Tarrau, Inmaculada Gutiérrez, Oriol Cros, Antonio Pujol, Ariadna Farrés, Antonia Martínez e Edgar Gerotina.

Er actuau baile de Naut Aran, César Ruiz-Canela, torne a presentar-se ara reeleccion per CdAacompanhat per David Torres, Marcos Amiell, Andrés España, Juan Manuel Paba, María Ángeles Ordax, Mònica Moga, Manuel Capel e Casimir Vilo.

Es resultats enes urnes dideràn, fin finau, quina serà era composicion d’aguest Ajuntament e des EMD’s entàs pròplèus quate ans.

Clara Villar