Espòrts
Era sindica d’Aran recep ath director generau tath Repte Demografic deth govèrn d’Astúries
06/06/2024
Ua delegacion dera Red Asturiana de Desarrollo Rural (READER) s’a desplaçat entà Aran tà conéisher de prumèra man es trabalhs que se desvolòpen ena Hub d’Innovacion HèPic-Centre d’Innovacion Territoriau de Montanha (CIT) a trauès deth Ministèri de Transicion Ecologica e Rèpte Demografic (MITECO), atau coma de tota era gestion que se hè en territòri
Era sindica d’Aran, Maria Vergés, a recebut aguest maitin ena sedença deth Govèrn d’Aran, amassa damb eth vicesindic dusau e conselhèr de Gestion Ambientau, Transicion Energetica e Innovacion, Oriol Sala, ua delegacion dera Red Asturiana de Desarrollo Rural deth Govèrn d’Astúries entestada peth director generau tath Rèpte Demografic d’Astúries, Marcos Niño.
Eth motiu dera visita ei conéisher de prumèra man es trabalhs que se hèn en Centre d’Innovacion Territoriau dera Val d’Aran, ath delà de d’autes accions territoriaus.
Eth motiu dera visita ei conéisher de prumèra man es trabalhs que se hèn en Centre d’Innovacion Territoriau dera Val d’Aran, ath delà de d’autes accions territoriaus.
Ath long dera jornada, era delegacion a assistit tara presentacion, per part de tecnics deth govèrn aranés, deth centre d’Innovacion HèPic e deth projècte OVIHUEC.DAT, entà desplaçar-se dempús entà Casau tà visitar eth Centre d’Empreses Innovadores, que compde damb era sala de Contròl de Pompièrs-Emergéncies. Pera tarde an visitat er Ecomusèu Çò de JoanChiquet era zòna de desvolopament deth projècte OVIHUEC.DAT, en Vilamòs.
Eth director generau tath Rèpte Demografic d’Astúries, Marcos Niño, a explicat eth motiu d’aguesta amassada de trabalh: “era visita ven mercada pera volontat de conéisher de prumèra man tota era faena que se hè en Aran per miei deth Centre d’Innovacion territoriau de montanha qu’à era Val d’Aran damb eth supòrt deth MITECO, nosati implementant aguest centre en Astúries e volem replicar ara eth modèl d’aciu entath nòste territòri”. A hijut: “Damb eth secretari generau tath Rèpte Demografic der Estat, Paco Boya, hè fòrça temps trabalham en aguest ahèr e creiguem convenient transferir eth sistèma de trabalh d’aciu pr’amor des similituds territoriaus”.
Entara sindica d’Aran, Maria Vergés: “Ei ua bona oportunitat entà hèr un escambi de coneishements e experiéncies, Astúries a un grana tradicion en impuls e desvolopament rurau e aquerò entà nosati ei un referent”. E a hijut: “pera nòsta part aportar eth trabalh que s’a hèt en Conselh Generau d’Aran a trauès de Hèpic, MITECO e era Secretaría Generau tath Rèpte Demografic ei de besonh entà possar projèctes coma LORA, de seguiment des ramats o eth projècte OVIUEC.DAT què ven de començar , damb uns projèctes transversaus com era gestion forestau, era metuda en valor de productes agroalimentaris e era pròpria gestion deth territòri, com es cremes controtlades des pompièrs que foncionen en Aran. Aguestes trobades permeten replicar aqueri projèctes que se pòden ajustar maugrat es diferéncies damb d’auti endrets, en aguest cas damb Astúries”.
Era Red Asturiana de Desarrollo Rural (READER) compde damb 71 municipis deth Principat d’Astúries e impulse projèctes coma iniciatives economiques e sociaus destinades ara creacion d’emplec e riquesa entà esvitar eth despoblament deth sòn miei rurau.
Manu Moga