Eth Conselh Generau d’Aran dejà a acuelhut era darrèra amassada entà premanir era seguretat e coordinacion deth pas deth Tour de França 2018 pera Val d’Aran, ena quau sigueren presents eth conselhèr de Territòri d’Aran, José Antonio Boya, es responsables des còssi e fòrces de seguretat e de Pompièrs e Emergéncies d’Aran.

Era 16au etapa deth Tour de França, que gesserà eth 24 de juriòl de Carcasona e arribarà a Bagnères de Luchon (un totau de 218 Km), passarà Les e Bossòst, en tot entrar per Pontaut e en tot gésser peth Còth deth Portilhon en direccion entà Luchon. Aguesti 18 quilomètres seràn es unics dehòra des termières franceses de tot eth recorregut deth Tour 2018.

Ath sòn pas pera Val d’Aran es ciclistes encararàn es 8 quilomètres dera pujada deth Còth deth Portilhon, de dusau categoria, damb rampes deth 6,85% de mejana e a 1.293 mètres d'altitud.

Era 17au etapa gesserà a compdar de Bagnères de Luchon en direccion a Saint Lary Soulan, hèt qu'implique que fòrça des equipes dera edicion deth Tour d’enguan hèsquen net es establiments otelèrs dera Val d’Aran, aspècte que tanben s’a previst ena amassada locau de seguretat.

IMATGE: CONSELH GENERAU D'ARAN