Espòrts
Comence era agropacion de ramats de oelhes e crabes en Beret, Casau e Vilamòs
03/06/2024
Ei eth prumèr viatge que Vilamòs, a peticion des ramadèrs deth Baish Aran, acuelh ua agropacion
Aguesta dimenjada s’an hèt es darrères agropacions de ramat de bestiar ovin e crabum dera Val d’Aran. Era prumèra agropacion que se hec siguec era de Casau, eth passat 18 de mai. Ad aguesta s’i an hijut dissabte Vilamòs e dimenge Beret.
Eth ramat de Casau pèish en entorn deth pòble tà dempús hèr eth darrèr desplaçament entath Santet de Casau, a on demorarà enquiara tardor. En aquerò que hè a Vilamòs, era agropacion se tròbe, des deth dissabte, enes entorns des prats deth pòble entara neteja des peisheus, e dempús se n’anarà entà Uishèra. En cas de Beret eth bestiar se trape en solan de Tredòs entà dempús desplaçar-se entàs prats de Beret.
Entath conselhèr de Territòri, Paisatge e Cambi Climatic, Francisco Bruna: “Era agropacion de ramats compde un an mès damb eth supòrt deth Conselh Generau d’Aran entà hèr ua cobertura que permete garantir era seguretat deth bestiar e evitar atau possibles atacs d’os que se trapen ena nauta montanha”. Bruna a hijut: “ei important entàs ramadèrs d’Aran ampliar eth nombre d’agropacions, aguest ei eth cas de Vilamòs, qu’enguan se hig ath hilat, ja que supòse dar cobertura a toti es ramadèrs deth país, ua implementacion atenguda des deth Conselh Generau hèta per part des ramadèrs deth Baish Aran entà evitar qu’es sòns ramats s’agen de desplaçar enquia Casau”.
Tanben a volgut arregraïr era predisposicion per part des responsables des ajuntaments deth Naut Aran, Vilamòs e era EMD de Casau, ara ora de cedir es terrens publics tad aguesta accion.
HÒNT: CONSELH GENERAU D'ARAN
HÒNT: CONSELH GENERAU D'ARAN
Manu Moga