Baqueira, premanida tà inaugurar era sason eth deluns 14 de deseme

12/12/2020

Diuendres passat a prumèra ora deth maitin esclataue era notícia: es estacions d'esquí catalanes autant publiques com privades dauririen eth deluns 14 de deseme.

Baqueira/Beret ac corroboraue dempús: es pistes d'esquí araneses ja cauhauen motors entà inaugurar era sason de nhèu. Ac haràn aguest deluns, damb 13 remontadors en airau de Baqueira qu'aufrissen uns 36 quilomètres esquiables. 

En aguest sens, era estacion a previst daurir mès zònes deth domeni esquiable s'es condicions de nhèu e era entrada enes naui trams de desescalada des mesures covid19 ac permeten.

Er emplec dera masqueta serà obligatòri en tota era estacion: enes accèssi, coes e entà pujar enes remontadors. 

Era dubertura dera estacion ei ua bona notícia entath país. Totun, deuant es bones donades epidemiologiques der Aran e entà poder hèr efectiva era reactivacion economica, eth govèrn aranés a demanat ara generalitat eth suslhèuament des restriccions de mobilitat pendent era dimenjada.

Peth moment, çò qu'a lheuat era Generalitat ei era restriccion de mobilitat per municipis pendent era dimenjada, que passarà a èster comarcau a compdar de diuendres que ven.

Laura Rodríguez