Per dusau an consecutiu, er aranés Aymar Navarro formarà part deth Freeride World Tour (FWT), eth circuit de maximala categoria internacionau d'esquí e snowboard dehòra de pistes.

Navarro, que s’a convertit en tot un referent nacionau d’aguest espòrt, a arrecebut ua invitacion entà formar part deth circuit de 2019, en tot afrontar atau era sua dusau sason ena elèit mondiau deth freeride.

Era passada sason, ua lesion en jolh non empedic que participèsse en Vallnord Ordino-Arcalís, maugrat es molèsties e dolors que patie.

Dies mès tard, e encara sense auer recuperat era totau mobilitat en jolh, Aymar tornèc a participar ena quatau parada deth circuit en Fieberbrunn (Àustria).

Es resultats obtengudi enes quate prumères pròves non le permeteren passar eth talh tara grana finau de Verbier, en Soïssa, e recalificar automaticaments entath tour deth 2019, mès eth sòn talent e compromís damb aguest espòrt li a valgut tà qu'eth FWT torne a confiar en eth, en tot obtier ua des set wildcards de sason qu’era organizacion acabe de publicar, en tot barrar atau era lista de riders entath circuit der an que ven.

En 2017 Navarro participèc coma wildcard locau ena pròve d'Andòrra e artenhec un istoric tresau lòc damb ua impressionanta linha que demorèc tath rebrembe coma ua des melhors dera sason.