Destacada
Vielha acuelherà eth Campionat de Catalonha de patinatge artístic
Era competicion aurà lòc en Palai de Gèu de Vielha es dies 11 e 12 de març damb 123 patinadors d'Espanha
Vielha acuelherà es pròplèus dies 11 e 12 de març era celebracion deth Campionat de Catalonha de Patinatge Artistic, qu’enguan supause tanben era prumèra edicion dera Copa Vielha. Eth Palai de Gèu receberà a un totau de 123 patinadors procedenti de diuèrses parts der Estat, damb era nauetat dera participacion dera Federacion Andalusa, gràcies as patinadors deth club Mulhacen de Granada. Ei eth 2au viatge que Vielha acuelh ua pròva de patinatge importanta aguest iuèrn, dempús deth Campionat d’Espanha celebrat en deseme.
Aguest Campionat de Catalonha aurà un totau de 6 categories, en tot començar damb patinadors de mens de 10 ans, e damb era participacion de patinadors que preneren part deth passat Campionat d’Espanha. Per part deth club CEGVA i participaràn un totau de 10 patinadors, damb er objectiu de poder arténher beth pòdium. Entà auer tot prèst ena competicion, s’a realizat un esfòrç important per part des desparièrs institucions que la organizen.
Aguesta pròva servirà entà premanir era pròplèu competicion deth Campionat d’Espanha qu’aurà lòc pendent eth 29 e 30 d’abriu en Puigicerdà, damb era participacion dera rèsta de categories que non se disputèren en Vielha en deseme.