Eth passat dissabte en estadi Municipau dera Cauarca de Les auec lòc eth partit entre era equipa locau e er Alguaire, equips damb aspiracions fòrça disparières: eth prumèr se trapaue darrèr dera liga e es visitants, en cas de conseguir era victòria, se vedien damb possibilitats d'ascéner de categoria. 

Er inici deth partit ère amarg entath Les, qu'as 10 menutes perdie 0-2, dus gòls a pilòta parada per ua falta dirècta e un penalti. Mès es jogadors aranesi, auent en compde es sues necessitats de puntuar, non se dèren per vençuts e empatèren damb dus gòls de Rodrigo Folgar. 

Acabant era prumèra part, er Alguaire se tornèc a auançar en mercador, mès Ruben Rella, gràcies a ua passada millimetrada deth portèr aranés, Edu Horta, conseguie desmercar-se des defenses e empataue eth partit 3-3, resultat damb eth que començarien era dusau part. 

Aguest mercador hège iniciar era dusau part ar AF Les damb fòrça ganes e fòrça possibilitats.

Ena menuta 60 arribaue eth dusau gòl de Ruben Rella gràcies a ua recuperacion de Miguel Gorratxategui, que non daue era pilòta per perduda e pressionant ath porter contrari conseguie recuperar-la e assistir. 

Er Alguaire tornarie encara a empatar eth jòc a 4-4 dètz menutes mès tard tanben a pilòta parada en ua jogada de còrner. 

Ena menuta 80 era equipa locau tornaue a auançar-se en mercador ara gessuda d'un còrner, gràcies ara rematada de cap deth defensa Sergio Rella,conseguint eth 5-4,  mès aguest resultat encara non serie definitiu. Er arbitre senhalaue un penalti en menut 86 que tornaue a igualar eth mercador (5-5).

Quan es dues equipes pensauen qu'aguest serie eth resultat finau, ena menuta 89 Luis Lanza, tornaue a rematar ua auta bona passada de Hector Moreno des deth còrner, conseguint eth 6-5: resultat definitiu que hè qu'era AF Les gèsque de posicions de descens a falta de tres partits e pogue creir ena permanéncia.