Dempús dera renóncia dera Fundacion Pere Tarrés tà gestionar Era Aubèrja Era Garona coma adjudicatari deth concors public licitat en an 2016, Unitat d’Aran envièc ua carta ath Govèrn d’Aran entà conéisher mès detalhs sus aguesta decision, qu’arribe quan era fundacion dejà aurie d’èster en tot gestionar er equipament de Salardú. Diuèrsi tramits administratius son es motius pes quaus Pere Tarrés a renonciat ad aguesta gestion, e era oposicion deth Conselh dejà a podut conéisher toti es detalhs per part deth Govèrn d’Aran.

Aguest pròplèu deluns se celebrarà ua naua session plenària deth Conselh Generau d’Aran, a on ena orde deth dia i aurà precisaments er ahèr que tanh a Era Aubèrja Era Garona. Semble èster, que se demanarà ua ampliacion deth termini abantes aguesta decision dera fundacion Pere Tarrés non sigue definitiua.

Mentre non i age un acòrd definitiu entre andues parts, era gestion d’Era Aubèrja contunharà en mans deth Conselh Generau d’Aran coma enquiara. Se mès non, semble qu’aumens serà de besonh demorar ara primauera entà saber se, fin finau, era Fundacion Pere Tarrés gestionarà aguest equipament coma ère previst.