Aguest vèspe, un centenat de persones s’an concentrat ena plaça dera Glèisa de Vielha en tot commemorar es 4 mesi que Jordi Sanchez e Jordi Cuixart son ena preson, en tot demanar era sua desliurança, atau coma era dera rèsta de polítics que i son arraïtz deth referendum der 1 d’octobre.En acte, i a estat present Jordi Turull, deputat de Junts Per Catalunya, que siguec tanben 32 dies ena preson. Turull a remercat que non se pòt acceptar com un acte abituau que i age gent ena preson pes sues idèes politiques.

Pendent era concentracion, era gent sostiege pannèus en tot reivindicar era proteccion der aranés. Aguest ahèr a prenut ua grana importància pendent aguesti darrèri dies, dempús de qu’eth Tribunau Constitucionau age suspenut era preferéncia der aranés ena relacion des administracions publiques deth país.

Fin finau, Turull tanben a volut deishar clar en moment politic que viu Catalonha ara madeish, qu’era unica manèra de desencalhar era manca de govèrn, ei acceptar es resultats deth passat 21-D, en tot assegurar que Puigdemont, serà eth pròplèu president dera Generalitat.

Er acte s’a barrat damb era intepretacion der imne d’Aran, Montanhes Araneses, en tot simbolizar un des trèts caracteristics mès importants qu’a era Val d’Aran e es sòns ciutadans.