Er Ajuntament de Bausen pòrte paralisat des deth passat mes d’ocubre pera abséncia dera figura deth secretari. En conséisher aguesta situacion, des deth Conselh se portèc a tèrme ua convocatòria entà poder cobrir era plaça, mès per motius desconeishudi s’anullèc. Hè dues setmanes, eth secretari de Vilaller s’aufric entad aguest cargue e, des d’alavetz, eth pòble de Bausen ei ara demora d’un nomenament que permete desblocar era situacion.

Aguesta plaça, que depen deth Conselh Generau d’Aran e deth departament de Governacion dera Generalitat, ei indispensable entà desblocar era grèu situacion ena que se trape er Ajuntament. Sense secretari… non se pòden realizar plens, e per aguest motiu non s’an pogut aprovar encara es pressupòsti deth 2017.

Era aprovacion des presupòsti ei plan importanta entath pòble, pr’amor que sense era, er Ajuntament non a dret a arrecéber cap tipe de subvencion ne ajuda economica.

Des der Ajuntament de Bausen, se demore qu’eth nomenament deth secretari se produsisque lèu entà poder començar a aplicar es mesures de besonh, e acabar damb eth blocatge administratiu que patissen des de hè tres mesi.